Nasin cand’ as prantas nasen,
No mes das froles nasin,
Nunh’ alborada mainíña,
Nunh’ alborada d’ abril.
(Rosalía de Castro)
Ata o ano pasado –2021– era comunmente aceptado que Rosalía de Castro nacera o 24 de Febreiro de 1837. Esa era a data –Día de Rosalía– na que por toda Galiza se homenaxeaba a autora de Cantares gallegos e Follas novas.
Tras as investigacións realizadas por Sagrario Abelleira, temos a certeza de que o día real de nacemento de Rosalía é o 23 de febreiro e non 24. A investigadora localizou no Arquivo Histórico Diocesano de Madrid o expediente matrimonial da vida de Rosalía e Murguía. Na documentación, entre outra información inédita, aparece a data de nacemento de Rosalía: 23 de febreiro de 1837.
A nova data de nacemento de Rosalía de Castro. Nós Diario, 5 de outubro de 2021.
Logo dos últimos descubrimentos, o 18 de xaneiro a Fundación Rosalía de Castro reunía a representantes de institucións culturais e educativas para tomaren a decisión de cambiar o Día de Rosalía ao 23 de febreiro.
O Día de Rosalía pasa a celebrarse o 23 de febreiro. Fundación Rosalía de Castro. 16 de xaneiro de 2022.
A Fundación Rosalía de Castro chamaba a sociedade galega a celebrar o Día de Rosalía, desta volta o 23 de febreiro, lendo os seus textos, cunha Alborada de Rosalía e facendo un Caldo de Gloria, para o que convoca de novo a escolas e restaurantes de todo o país a esta iniciativa inspirada no poema “Miña casiña, meu lar” na que a poeta explica como facer un caldo humilde e no que se relata a épica diaria da supervivencia
De noite, de dia,
N’ aurora, na sera,
Oiresme cantando
Por montes e veigas.
Quen queira me chame,
Quen queira m’ obrige,
Cantar, cantareille
De noit’ e de dia.
Este 23 de febreiro celebremos por todo o alto o Día de Rosalía.
