Rosalía de Castro viviu Coruña durante catro anos, na década dos setenta do século XIX, de 1871 a 1875.

Na nosa cidade xa estivera en 1861, ao regreso dunha viaxe de Madrid.

“A Coruña estaba fermosísima. Unha temperatura de primavera e un sol brillante. Estaba por ficar xa nela”

(Carta de Rosalía de Castro a Manuel Murguía, 16 de decembro de 1861).

Logo de que Manuel Murguía foi nomeado director do Arquivo Xeral do Reino, a familia instálase no número 3 da rúa do Príncipe, naquela altura chamada de Padilla. Rosalía chega a Coruña coa familia na última semana do mes de xaneiro de 1871. Pero a mediados de 1874 xa vive na rúa Campo de San Agustín nº 10.

Son moitas as pegadas que existen na cidade para podermos homenaxear a escritora: o teatro principal da cidade leva o seu nome, unha rúa, un colexio de infantil e primaria, unha estatua, os seus versos no Xardín de San Carlos, o seu nome nas vidreiras do Pazo Municipal… E mesmo da Coruña partiu a idea de pór o seu nome a unha estrela…

Desde a AC Alexandre Bóveda queremos contribuír dalgún xeito para que a súa obra sexa aínda máis coñecida e recoñecida por iso elaboramos dúas propostas didácticas para coñecer máis e mellor a Rosalía de Castro.