O xoves 2 de xuño, ás 19.30 h, Martin Pawley falaranos do cinema dos pobos orixinarios.
Pobos indíxenas, orixinarios, primeiras nacións, aborixes… Sexa cal for a denominación que empreguemos, é importante recordarmos que as comunidades descendentes dos primeiros poboadores antes das colonizacións europeas alí e acolá foron, son e serán creadoras de cultura, arte e coñecemento, e iso inclúe, por suposto, o cinema. Nesta sesión apuntaremos algúns nomes fundamentais, da veterana activista e directora abnaki Alanis Obomsawin ao creador kayteyte Warwick Thornton, pasando pola vizosa variedade fílmica que hoxe agroma na América do Sur con cineastas como a mapuche Claudia Huaiquimilla ou o aymará Miguel Hilari.
Martin Pawley é crítico de cinema, programador e produtor.