O sábado 28 de outubro, ás 12 da mañá, faremos unha visita guiada á exposición Non finito de Tono Galán no Kiosco Alfonso.
A exposición de Tono, Antonio Galán Fuentes, que se mostra no Kiosco Alfonso da Coruña, abarca a súa andaina dende os anos 90 do século pasado até a actualidade. A exposición percorre os 30 anos de carreira artística de Tono e nela pódense contemplar os seus inicios de cativo con debuxos saídos nun xornal, os seus primeiros pasos co realismo como expresión formal e a súa evolución na que a pegada das vangardas históricas e a paixón polas artes primeiras ou a arte da loucura conforman o seu pensamento máis íntimo transformado en formas e cores en distintos e múltiples materiais que a inquedanza do artista manifesta con total respecto ao óleo, a pedra, a prata, o ferro ou o papel, entre outros.