O mércores 4 de maio, ás 19.30 h, organizamos no noso local da rúa Olmos, 16, unha palestra sobre o proceso de creación do espectáculo teatral Libre coma os paxaros, con Rosalía de Castro como protagonista única nun monólogo dramático que transita polas duras circunstancias que determinan a súa vida e a da maioría de galegas e galegos na sociedade do seu tempo.
María Pilar García Negro, grande estudosa da vida e da obra de Rosalía, sitúanos no contexto histórico; María Barcala, actriz que lle dá vida no espectáculo, e Xulio Lago, responsábel da dramaturxia e a dirección do mesmo, dan noticia, cada un desde a súa parcela creativa, das particularidades do seu traballo creativo. Todo baixo a coordinación do escritor Lois Diéguez.