“Dos campesinas”. María Antonia Dans, 1963. Óleo sobre lenzo da colección Galería Arboreda.
O mércores 23 de novembro, ás 19.30 h, Rosario Sarmiento ofreceranos unha palestra arredor de María Antonia Dans, a enerxía e fortaleza dunha creadora.
Neste ano 2022 no que se cumpre o cen aniversario do nacemento de Mª Antonia Dans (Oza dos Rios, A Coruña, 1922- Madrid, 1988), reivindicar a unha creadora plástica da súa relevancia, é sen dubida unha obrigación. Mª Antonia Dans foi unha artista de éxito e recoñecemento, pero sobre todo foi unha muller comprometida coa súa condición feminina nuns tempos nos que esa actitude supoñía unha toma de conciencia e unha loita por ser ela mesma non sempre fácil.
Galicia, a cor e a idiosincrasia do campo galego están sempre presentes na sua obra. Paisaxes, pequenas escenas festivas ou portuarias… pero sobre todo, as mulleres. Mulleres campesiñas, vendedoras, pasadoras de ferro, rosquilleiras… constitúen a sua referencia creativa, a espiña dorsal das súas obras.
Rosario Sarmiento é licenciada en Historia, critica de arte e comisaria de exposicións, xestora cultural e especialista en coleccionismo e na historia da arte da muller en Galicia. Dirixiu o documental “ARTE+MULLER+GALICIA”, Premio “Luisa Villalta” de Cultura e Igualdade no ano 2018. É autora do recente libro, Mª Antonia Dans, publicado pola Deputación de A Coruña dentro da súa colección Grandes Artistas da Pintura.
Se queres asistir envíanos os teus datos a través deste formulario: