O xoves 20 de maio, ás 19.30 h, no noso local, Pepe Barro falaranos dos símbolos de Galiza.
Alén do escudo e da bandeira, en Galiza hai outros símbolos arredor da idea de país. Uns chegaron a ser “oficiais”, outros mantivéronse como alternativos, algúns esmoreceron, porque os símbolos non son eternos, loxicamente tanto a identidade colectiva como a persoal cambian ao longo dos anos. E tampouco teñen todos o mesmo significado, os símbolos dun país presentan matices diversos. Uns veñen dos ámbitos da literatura, da filosofía, da relixión ou da tradición étnica, outros son directamente políticos, hainos arraizados na historia e algúns son tan evidentes que non os vemos. Tentaremos debullar, sempre ilustrado con imaxes, o como e o porqué.
Escudo de caetra, alegorías femininas, vieira, Santiago cabaleiro, escudo heráldico, Cruz de Santiago, carballo, piñeiro, dragón, azul e branco, gaita ou gaiteiro, bandeira, fouce, letra galega, cruceiro, anta, estrela, hórreo, vaca, tríscele, mapa-illa, espiral.
Pepe Barro é deseñador gráfico con máis de corenta anos no exercicio da profesión, sempre preocupado tamén en explicar de onde veñen e como se desenvolveron os símbolos que comunican a idea de Galiza.
Ás persoas asistentes agasallaráselle cunha pequena publicación, de 8 páxinas, realizada por Pepe Barro para esta ocasión.