O mércores 15 de xaneiro, ás 20 horas, Narciso de Gabriel presenta o seu libro “Xosé María Álvarez Blázquez”, publicado por Galaxia, Estará acompañado por Celso Álvarez Cáccamo, fillo de Xosé María Álvarez.
O libro consta de catro capítulos, no primeiro dos cales se describen os anos de formación de Xosé María Álvarez Blázquez (1915-1985), que tiveron como escenarios o Tui natal e Pontevedra, cidade onde cursou os estudos de maxisterio. Deseguido analízase o Diario del maestro que escribiu durante o seu ano de prácticas na escola graduada de Tui (1934-35). Os dous últimos capítulos tratan sobre o proceso de depuración a que foi sometido e o seu desterro en Coreses (Zamora).
Narciso de Gabriel é catedrático de Historia da Educación na Universidade da Coruña. Foi director do Departamento de Pedagoxía e Didáctica (1993-2005) e decano da Facultade de Ciencias da Educación (2005-2012). É autor dos libros Agricultura e escola. Contra a rutina e o éxodo rural (1989); Leer, escribir y contar. Escolarización popular y sociedad en Galicia (1875-1900) (1990); Escolantes e escolas de ferrado (2002); Arximiro Rico, luz dos humildes (2002); Ler e escribir en Galicia. A alfabetización dos galegos e das galegas nos séculos XIX e XX (2006); Elisa e Marcela. Alén dos homes (2008, traducido ao castelán en 2010); 25 anos de UDC. A Universidade na Coruña e Ferrol (2015) e Elisa e Marcela. Amigas e amantes (2019).