Ler non serve para nada

Porque os libros, dalgunha maneira, deséxannos. Chámannos.
Abrámolos, pois.
Escoitemos esa chamada.
Había unha vez…
Foi daquela cando…
Dicía Scherezade… (Xavier Seoane)

@s lector@s somos unha tribo amadora e resistente, sempre a facer apoloxía, falando de libros ou falando do desexo e gozo da lectura. Así que imos animarvos hoxe a que nestes días de compras e de galanos, o agasallo escollido sexa un libro, ou dous, ou tres ou catro…, LIBROS PARA TOD@S.

Queremos reivindicar, celebrar, impulsar, chamar a máis xentes á lectura, poñernos como un deber neste ano que comeza asumir a tarefa de contribuír a facer lectores e lectoras que (parafraseando a Celso Emilio) len porque si, porque lles peta, porque lles gusta, porque lles sae de dentro, alá do fondo!

Deixou dito o escritor e editor Alberto Manguel: Ler será no futuro un acto de rebeldía. Así que para comezar a forxar rebeldes imos hoxe animar a lectura a través da pintura.

E podemos comezar por esta Moza con libro, de Pietro Antonio Rotati (1707-1762). Que contará ese libro? Ese sorriso, eses ollos, que acabarán de ler?

Moza con libro, de Pietro Antonio Rotati

Ou esta Muller lendo de Pieter Janssens Elinga (1623–1682).

Pieter Janssen-Muller lendo-

Ou viaxar até o Renacemento e botar man de Antonio Allegri Correggio (1489 –1534).

Antonio Allegri Correggio (1530-)

Ou de Domenico Fetti (1588-1623) e esta moza de roupas humildes mais gozando coa lectura porque xa o dixo Rubén Darío: O libro é o telescopio con que se ve o infinito.

Domenico Fetti (1588-1623)

Para aquelas atraídas polo impresionismo debedes saber que tanto a Edgar Degas (1834- 1917) como a Pierre-Auguste Renoir (1841-1919) lles gustaba retratar a mulleres lendo.

Tamén temos obra de Henri Matisse (1869 – 1954) para amosarvos hoxe…

E de Claude Monet (1840-1926)

Se ti es máis de Pablo Picasso (1881-1973) tamén che podemos amosar obra del. Xa ves que aquí a lectura semella un acto para realizar en compañía.

Ou podemos pararnos a admirar a obra de Aleksandr Deineka (1899 –1969), unha das máis destacadas figuras do Realismo socialista.

Moza cun libro. Alexandr Deineka

Ou gozar con Antoine Joseph Wiertz (1806 – 1865) pintor romántico belga.

Antoine Joseph Wiertz: a lectora de novelas

Ou parase a contemplar esa Moza lendo de Theodore Roussel (1847- 1926) que foi considerado pola crítica do seu tempo como o mellor nu da época.

Thédore Roussel: moza lendo

Non deberiamos buscar só pintores europeos: que che parece esta obra do pintor brasileiro Aldemir Martins (1922- 2006)?

Aldemir Martins

Ou podemos botar man do pintor estadounidense, Edward Hopper (1882- 1967)

Edward Hopper: habitación de hotel

Ou admirar a obra de William McGregor Paxton (1869 – 1941)

William Mcgregor Paxton-1910

E aínda podemos contar co pintor naturalista Allan Banks, con esta muller lendo unha tarde soleada.

Allan Banks: lendo nunha tarde soleada

Ti es das que prefires obra artística de mulleres?

Podemosche amosar obra de Mary Stevenson Cassatt (1844 –1926)

La señora Duffee leyendo (1876), de Mary Cassatt

De Tamara de Lempicka (1898 -1980) a retratista más importante do estilo Art Decó.

Tamara de Lempicka

De Florence Ada Fuller (1867 – 1946) a artista australiana nacida en Sudáfrica.

Florence Fuller. 1900

Ou de Charlotte Salomon, pintora xudía de orixe alemán, asasinada no campo de concentración de Auschwitz.

Charlotte Salomon

Sen esquecer, claro, A escola de Doloriñas de Xulia Minguillón (1906 -1965) porque escola e lectura van sempre moi unidas, mais é ben certo que seguimos aprendendo a ler moito despois de deixada a escola. Empreguei oitenta anos para aprender a ler e non podo dicir que domine ese labor (Goethe)

A escola de Doloriñas. Xulia Minguillón

 

E rematamos como empezabamos cunha cita de Gabriel Zaid, pensador mexicano de ascendencia palestina: Ler non serve para nada, é un vicio, unha felicidade.

Leave a Reply

Uso de cookies

Utilizamos cookies propias e de terceiros, como Google Analytics, para optimizar a túa navegación e realizar tarefas de análise. Entendemos que estás conforme se continúas navegando nesta web. Política de cookies

ACEPTAR
Aviso de cookies