María Barbeito na Coruña – Paseos en agosto XXVII

CEIP María Barbeito

Este colexio da zona do Ventorrillo na Coruña leva o nome da pedagoga, escritora e profesora María Barbeito.

CEIP María Barbeito

Unha boa homenaxe a unha docente é darlle o seu nome a un colexio, neste caso, CEIP María Barbeito. Nada na Coruña en 1880 e logo de cursar a carreira, María Nicolasa Paula Barbeito Cerviño escolleu como destino a Escola Graduada Pública de Párvulos “Da Guarda”, na Coruña, da que foi directora.

Escolas da Guarda

María Barbeito converteu a escola en pioneira da renovación pedagóxica. Unha metodoloxía baseada en fundamentos psicopedagóxicos de liberdade e autoactividade das nenas e nenos nun ambiente que favorecía o seu desenvolvemento.

Busto a María Barbeito

Co triunfo do golpe de estado en 1936 foi afastada do seu posto de mestra das escolas Da Garda. En 1941, foi destituída dos seus cargos académicos e obrigada a xubilarse. A partir de entón, inicia unha nova etapa dedicada á escritura e á tradución do francés.

Na pedagoxía, interesáballe a figura do bilingüismo na escola galega. En 1931 publicou un artigo no Boletín da Academia Galega no que reivindicaba –desde un rexionalismo puro– a necesidade de:

Dedicar un día á semana para a lectura, escritura e conversa na lingua vernácula para todos os alumnos sen distinción. Lecturas e recitacións ese mesmo día, dos nosos poetas e prosistas máis destacados.

Placa da rúa María Barbeito

Nun lugar céntrico e concorrido da cidade da Coruña está a rúa que homenaxea a María Barbeito. Casada en 1909 con Juan Martínez Morás –fillo de Andrés Martínez Salazar–, o matrimonio tivo tres fillos: Juan, Carlos e Isabel.

Rúa María Barbeito

María Barbeito pertenceu á Real Academia Galega e ao Instituto de Estudos Galegos Padre Sarmiento.

Falecía na Coruña en 1970.

Tumba de María Barbeito

Os seus restos descansan no Cemiterio de Santo Amaro, na Coruña.

Lápida de María Barbeito

Deixa un comentario

Uso de cookies

Utilizamos cookies propias e de terceiros, como Google Analytics, para optimizar a túa navegación e realizar tarefas de análise. Entendemos que estás conforme se continúas navegando nesta web. Política de cookies

ACEPTAR
Aviso de cookies