Na Coruña –o día 5 de febreiro de 1999–, databa Lois Diéguez Vázquez (Monforte de Lemos, 1944) o poema titulado “Cambio de morada”. Versos dedicados a Manuel María e Saleta Goi García con motivo do seu traslado á Coruña en 1998.

CAMBIO DE MORADA

 

                                   A Manuel e Saleta

                                   que agora viven na                

                                   Coruña.

 

Viver o mar agora,

a luz das nubes brancas que vén do infinito

medindo cons de cercania

tras as novas xanelas.

A vida trouxo páxinas felices

en horizontes anunciados.

Naceu, quizá, outra palabra

se a palabra pode ter outra calor.

Paisaxes de azul e grises,

niño de sempre salgado de mar,

o paseo longo para apurá-lo

cada tarde

no murmúrio grande das ondas,

na amizade que se espella nas vidreiras

do peirao percurado.

E nós vimos de máis aló do frio

presenciar tanta alegria,

algunha vez,

ainda que no corazón

se nos abra unha brasa

e sintamos lonxíncua a calor

daquelas palabras.

A fin é sempre a alegria,

non o esquecemos,

e sempre a paisaxe se harmoniza

co anseio dunha nova morada.

Asi que, amando-a tamén, e visitando-a

facemo-la nosa como eles

e gozamo-la.