Xabier P. DoCampo, escritor e mestre

Portal da casa de Xabier Docampo

Nesta casa – número 1 da praza José González Dopeso– da Coruña viviu o escritor e mestre Xabier P. DoCampo.

Nacín chairego e fillo de chairegos o 5 de abril de 1946 en Rábade (Lugo). Aos meus sete meses trasladámonos a Castro de Ribeiras de Lea, de alí era miña mai –meu pai de Xermar (Cospeito)–, onde fun por primeira vez á escola.

De Castro Ribeiras de Lea, cando Xabier comezaba a adolescencia, a familia enteira trasladouse a vivir á Coruña, pero sen perder nunca o contacto coa Terra Chá.

Placa no portal da casa de Xabier Docampo

 Na Coruña estuda o Bacharelato e Maxisterio:

Traballei como mestre en varios colexios e durante oito anos en Preescolar na Casa. Estiven sempre relacionado cos movementos de renovación pedagóxica.

Escola A Normal da Coruña

A Xabier preocupoulle todo o relacionado coa didáctica da lingua e a literatura:

Dei cursos a profesores e lin ponencias en congresos sobre a didáctica da lingua e a literatura, sobre a lectura e a súa implantación escolar e social, sobre a narración oral, a súa estrutura, a súa influencia na literatura escrita e a súa utilización didáctica, tanto en Galicia coma fóra.

Edificio de RTVE na Coruña

Fun actor e director de teatro. Traballei durante sete anos en Radio Nacional de España en Galicia como guionista e como director de programas de diverso tipo e formato. Tamén escribín e dirixín obras para vídeo e para televisión. Dei cursos a profesores sobre a utilización didáctica de ambos medios.

Xabier P. DoCampo foi un dos grandes renovadores da literatura infantil–xuvenil galega, tamén un dos máis traducidos. Xeracións e xeracións de nenas e nenos leron e seguen lendo as páxinas d’O misterio das badaladas (1986) ou Cando petan na porta pola noite (1994). Por esta última obtivo en 1995 o Premio Nacional de Literatura Infantil e Xuvenil.

Experto en bibliotecas escolares, moito aportou Xabier P. DoCampo á narración oral e ao libro galego:

Participei na creación da Asociación Galega do Libro Infantil e Xuvenil (GALIX) na que pertencín durante cinco anos á súa xunta directiva, dous deles como presidente.

Monumento ao libro na Coruña

Como sinala a cita na placa que a Asociación de Escritoras e Escritores en Lingua Galega colocou na casa onde viviu Xabier na Coruña:

Sen dúbida, o acto máis sublime de amor que coñezo é contar unha historia.

Xabier P. DoCampo contounos moitas historias, orais e por escrito. Historias que seguen petando na nosa porta pola noite –e polo día– para acompañarnos.

Praza José González Dopeso

Tamén nós seguiremos petando na porta da lembranza. Xabier P. DoCampo falecía na Coruña o día 26 de xuño de 2018, pero o seu recordo e as súas “historias” seguen connosco.

A Asociación de Escritoras e Escritores en Lingua Galega (AELG) e a Asociación Cultural Alexandre Bóveda organizamos unha homenaxe ao escritor Xabier P DoCampo o 29 de maio de 2019 no teatro Rosalía:

Para máis información, a ficha de Xabier P. DoCampo na Biblioteca Virtual Galega da UDC.

Deixa un comentario

Uso de cookies

Utilizamos cookies propias e de terceiros, como Google Analytics, para optimizar a túa navegación e realizar tarefas de análise. Entendemos que estás conforme se continúas navegando nesta web. Política de cookies

ACEPTAR
Aviso de cookies