Dentro do ciclo Pensando o futuro, tivemos a oportunidade de escoitar –na Agrupación Cultural Alexandre Bóveda– a palestra Os retos do xornalismo en chave galega e feminista. A encargada de impartila era María Obelleiro, directora de Nós Diario.
Presentada por Xoán Costa –presidente e conselleiro delegado de Sermos Galiza S.A.–, María Obelleiro foi analizando os oito retos do xornalismo en clave galega e feminista.
Un deses retos –motivo polo que se creou Nós Diario– é a necesidade dunha axenda galega, unha axenda propia. Nun panorama onde temos sobredimensionado o que vén de Madrid, precisamos medios que creen e traten temáticas de intereses galegos. Hai unha serie de temas que os medios non soen tocar: o feminismo, a nosa historia, o mundo do traballo ou o ecoloxismo. De aí a importancia de ter unha axenda propia.
Outro dos retos dos que falou a directora de Nós Diario foi a necesidade de aplicar a perspectiva de xénero de maneira transversal. Hai que mudar a representación das mulleres. Os medios reproducen a representación asimétrica entre homes e mulleres. Así, os homes predominan nos apartados de economía e na política, mentres que as mulleres aparecen nos de sociedade, cultura, coidados ou expoñendo o corpo en publicidade. É preciso buscar fontes expertas que non sexan só homes para non seguir alimentando o patriarcado.
Alfabetizar nos medios e na información sería outro dos retos. Temos que aprender a ser críticos coas imaxes e coa información. Neste sentido, o ensino ten un importante papel: contribuír a avaliar de maneira crítica os medios de información, dado que calidade da información condiciona a nosa vida.
Chamou María Obelleiro a superar a ditadura da actualidade, fenómeno que produce un xornalismo de consumo rápido. Igualmente, salientou a necesidade de superar a cultura da gratuidade. Un xornalismo independente custa cartos. Precisamos facer un labor pedagóxico e destapar quen paga a información. É difícil facer xornalismo libre e non ceder ás presións.
A directora de Nós Diario sinalou que a Xunta de Galiza exclúe das axudas o xornalismo crítico. Deste xeito, Nós Diario, a pesar de cumprir os criterios das convocatorias, vese discriminado polo Executivo galego. Pola contra, outros medios que incumpren a toponimia, a cuestión de xénero e que inclúen anuncios por palabras sobre prostitución, si reciben as subvencións da Xunta. Sinalou María Obelleiro a falta de pluralidade: hai moitos medios de comunicación, mais están en poucas mans.
É preciso prestixiar o idioma galego. Os escasos medios impresos en galego representan para a directora de Nós Diario unha “anormalidade”.
O ciclo PENSANDO O FUTURO complétase con outras cinco palestras:
24 de outubro ás 19:30h: O futuro. Un mundo feliz? con Antonio Brea, historiador e divulgador.
7 de novembro ás 19:30h: Saúde mental e autocoidado nas mulleres con Iria Veiga, médica psiquiatra.
14 de novembro ás 19:30h: O sorbedoiro madrileño no horizonte de Galiza con Óscar Pazos, ensaísta e xeólogo
12 de decembro ás 19:30h: Impacto da intelixencia artificial nas nosas vidas: pasado, presente e futuro con Hugo López Fernández, investigador da Universidade de Vigo
19 de decembro ás 19:30h: Desposuimento e cultura galega contemporánea: cara unha crítica do marco da «España vacía» con Helena Miguélez–Carballeira, catedrática Universidade de Bangor.
